濕尻政府 軍政府 繼續大清算 連儂牆
國安法 突發

港語學執笠公告｜港語學

鑒於近日香港國安處人員到我嘅舊居，即我家人嘅住所搜查及問話，指港語學一篇廣東話徵文比賽參賽作品涉嫌違反《國安法》，要求下架。為咗保障我屋企人同前成員嘅安全，經諮詢法律意見，我決定即日起停止香港註冊社團港語學所有運作，並啟動解散程序。

本月22日，香港國安處人員喺朝早7點20分去到我嘅舊居，要求面見本人。當時家人回覆指我現時正身處外地，無法會面。但國安處人員仍然喺無搜查令嘅情況下，進入我家人嘅住所，並要求我屋企人向我轉達國安處要求，將港語學三年前「中西區廣東話徵文比賽」嘅一篇小說文章下架。

隨後我致電香港國安處查詢有關事件。國安處人員告知，當日曾搜查對我年前經營嘅蛋糕店，並提到本人家人及港語學舊有成員嘅情況，要求我即時下架有關文章。考慮到在港家人嘅情況，我當日亦將嗰一篇小說文章即時刪除。

國安處人員強調，係因為中西區民政處多番聯絡本人不果，諮詢律政司後，認為呢一篇小說文章違反《國安法》，先採取有關行動。但我翻查同中西區民政處嘅電郵來往紀錄，截至2021年12月21號，我向民政處查詢發還款項問題，至今未獲任何回覆，徨論通知將任何文章下架。

港語學喺2020年起，經區議會「社區參與撥款計劃」營辦廣東話徵文比賽、派發防疫物資等社區活動，但及後被民政事務處拖欠實報實銷嘅活動開支達30幾萬，由我墊支至今未獲處方還款。雖然如此，考慮到上述情況，為免影響在港家人及前成員，我亦唯有停止港語學嘅運作。

我必須強調，港語學由2020年至今，社區活動及組織工作均由我全權決定。而自從被民政處拖欠撥款，為減省成本，現時只有我經營會務及日常運作。至於社交平台及網站營運，亦係我一人負責管理及運作，同我家人、任何掛名成員或在港人士均無任何關係。

港語學喺2013年成立至今已有10年。當初申請社團註冊嘅時候，以「捍衛香港人嘅語言權利」為目的註冊，獲香港警務處批准為本港合法組織。10年來不僅遵守法律，為本港舉辦多個母語文化盛事，亦喺香港多次重大語言危機，包括教育局將廣東話列為非法定語言、考評局取消中文科口試、蔡若蓮上任局長並推行普通話教中文科政策等，港語學都恪守本分，致力守護香港人喺教育及社會層面使用母語，尤其廣東話及繁體字嘅權利。

奈何時移世易，喺2018年我因反對浸大強制普通話畢業測試，收到死亡恐嚇而被逼停止醫院實習，及後港語學亦因俾某大政黨舉報為「激進反中」組織，向廉政公署舉報。我以義務嘅身分，甚至墊支籌辦香港語言文化活動，但時至今日，竟令到本年初我被中國大陸海關禁止入境及將來往內地通行證」剪角，到近日屋企人受到騷擾。亦鑒於有年輕人甚至因為曾撰文反對普通話教中文政策，律政司以「煽動分裂國家罪」控告，被判近四年。我不得不中斷喺香港嘅保衛廣東話工作。

較早前， 我喺港語學網站寫作一篇附有截圖嘅文章，指出有評卷員喺小紅書販賣中學公開試評卷機密，及後有疑犯被捕。警方至今多次邀請我返港上庭作供。而家考慮到我目前返港嘅人身安全風險，恕未能配合。

由於港語學現時已經冇任何淨資產及人手繼續營運，加上相關法律風險，我已經停止港語學所有運作，並且會根據法律意見啟動解散程序。同時，我保留向香港政府收取「社區參與撥款計劃」欠付款項嘅權利。如有任何關於港語學解散程序嘅查詢，請電郵聯絡lokhang.andrew@gmail.com。

港語學主席

陳樂行 謹啟

二零二三年八月二十八日