[廢] 有親戚末期住院，一個禮拜前舅父通知我，然後煩膠阿姨幾日前就打嚟問我做咩唔去探病，講到病人好關心我媽，對我媽照顧有加。我唔係唔想去探，一來忙（我知忙呢個字係藉口，但我上禮拜朝九晚十，飯都無時間食）⋯

二來其實我知道自己仲係未放得低，唔係好想比呢啲嘢影響到情緒。但阿姨打得電話嚟，我就應承咗禮拜五晚上去探病，原本果日我20:00就可以返屋企...

雖然未到PTSD嘅程度，但我係極度抗拒去醫院。但應承咗人，而且果日唔去我就真係無時間了，於是上到去，病人問我食咗飯未，我話未，佢叫我同表哥去食飯，唔好咁辛苦自己。
因為係我媽果邊嘅親戚，神態語氣都好似，只不過我媽比較後生，同埋兩者入院condition都唔同，但我即刻喊到收唔到聲...

禮拜六（最忙最慌亂果一日 ）因為去完Shitty，所以順道又探咗一次，當日心情比較平靜（雖然後來唔見咗張staff card灰咗半日），病人做緊第二次化療，當時無人陪佢，得我一個，後來病人嘅舊同事嚟咗

去到尋日，阿姨又聯絡我，同我update病人嘅資料，佢知我連續兩日有去探病，同我講咗多謝，呢句多謝好突兀，我都唔知道佢係站於「屋企人」嘅身份，定先得我係一個「外人」

然後佢問我，「我update你會唔會影響你心情？」 我：「⋯⋯唔會」我答「會」又點，事實已經影響咗。

尋晚諗返，最後悔應該係當時無即刻辭咗份工，唔應該聽埋啲三姑六婆話要維持生計，所以一定唔可以辭工。但望返依家自己風流快活嘅消費模式，其實當年辭咗職多啲時間去醫院嘅話，根本就唔成問題。

事後點樣檢討都無用，已經無下次了，只能定期同自己講唔好怪自己。我唔係成日拎呢件事出嚟講，加上日漸忙碌，唔得閒諗呢樣果樣，但今次trigger得太過到位，去到唔同階段evaluate 當時嘅自己都有唔同體會。

雖然叫自己唔好怪自已，但，我最憎嘅都係自己，去到尋日再三反思，都係無改變過呢個諗法。