是日

好heavy但好好睇，好耐冇睇到一套係睇一半已經想二刷既劇

雖然context唔同但諗起人讀少年維特講既 一個人只要足夠敏感都會自殺唔記得原句

呢套係留白上做得極出色，通篇對白講左勁多野，但偏偏係冇講出口既野先係最重要，所有真正既想法都係由文字之間既空隙組成既空白
每一個人都有野想講，但每個人都唔知點樣講，因為敏感或者內疚顧忌將真正既想法包裝成完全唔同既野

佢唔係真係想了解我，佢只係想搵個合理解釋

家庭係呢度context下係一樣無論存在與否都使人痛苦既一樣野，無論跟住邊個生活最終個空間都係令人窒息，因為佢唔係你心目中既嗰個家，但入面存在既人又仍然看似以前熟悉既幸福，先令人無法割捨

家人呢種身分既他者又係一種好微妙既存在
佢同你極度親近，以至佔據左一大部分既生活，決定左你係邊個，有咩責任
佢受傷你同樣感覺到傷害，係他者面前你同佢係一體，但同時佢又確實唔係你，以致你有時正正就係製造傷害既人

每次試圖開心同試圖正常然後失敗都令Nicolas更痛苦

最後決定接唔接走個仔一幕好睇到家庭呢樣野既困局，你無論做邊個決定都一樣痛苦

然後係呢句 唔好擔心會冇事 係一句無力之下唯一可以講黎安慰自己同家人既說話

讚完劇本留白又想讚舞台設計
開始冇耐就俾Nicolas反左既檯，唔知幾時就反轉左既梳化，每個人都可以繼續係度如常生活好似視而不見咁，就係靠住 學識唔好諗呢啲問題 同 唔好擔心會冇事 一路扮睇唔到，因為落手去執去處理好辛苦，又好危險
但Sofia係首先去執好啲野既人，唔知呢個同佢最後安慰Pierre既身分有冇關係

一個擺位兩度門就做晒所有景呢個心思又係好出色

抑鬱症唔可以由屋企人處理，一部分因為佢地唔係專業醫生，另一部分應該都係因為對屋企人既愛本身都係一種壓力，發洩情緒令愛既人吸收負能量會令人內疚，而內疚就變成下一次負能量既源頭，只會無了期咁辛苦落去

本身覺得就算槍聲一幕之後完都可以，但最後一幕睇完再諗返，呢個可能先係呢套最悲劇既地方，又係留白既故事線以後，你可以想像到呢個新家庭既未來會俾咩籠罩住，呢種關係既陰霾只會一直留低俾下一個人

雖然唔太記得父親既內容，但感覺又係一套寫愛帶黎既痛苦既故仔

唔係淨係講出黎既野先有意義，冇講既野可能先最重要，同樣地唔係有咩人在場，可能最後不在場既人先係帶黎最大影響

愈回想愈覺得有種演緊世代既悲劇，like father like son