20240504
搭鐵for佢每半個鐘update一次 可以隨時掉頭

但真心 一路搭都係一路希望唔會取消
計一計條數 萬一又取消都真係好禾味 唔知之後要唱幾多場先可以填返個氹
所以唔取消完全係可以理解
好心D人諗清楚先買飛 本來5月就係雨季 搞得戶外場就自己有氣候影響既風險
至少特高都仲會同你update狀態
唔使大家去嘈去等
見到D人係fb催特高做決定 真係反左白眼
妖 你唔想睇就咪鬼去睇囉 又無人逼你買飛
再講 呢個決定一做落去隨時係幾千萬港紙既事 唔係街市買條菜囉
個D咩出唔到門口就諗下辦法啦 辦法總比困難多啊
都係個句 係真心愛佢地就永遠唔會搵呢D野黎留難佢地

去到ifc去廁所 超爆多人(平時都係去大會堂 顯然班人唔識去大會堂個廁所嘻嘻
前行D搵到個無咁多人既女廁
去完行返出黎 都未返到出去商場就比人搭膊頭
心諗咩料 一擰轉頭果然係大6人 一開口就問知不知道怎麼去
又無請問又無唔好意思 真係睬你都有尾
一句得埋去話不知道
又係去既路上 海傍條路塞實哂 咁咪行返近大會堂個D條路
行行又比人拍膊頭 點知原來又係大6人……
不過佢地係好心提醒我個電話要擺返前D
我都有謝謝佢地

不過經過51既事 我真係無辦法笑住同佢地講野
雖然我理智好清醒提過自己 佢地唔係全部係咁 都有D係正常人 甚至我自己都有認識正常人
但係一諗到佢地當左香港係自己主場 我就無辦法
如果係以前 廁所搭我膊頭個個 我會唔好意思咁同佢講
不好意思 我不知道 你可能要問其他人
如果你以前 提我擺好電話個個 我會微微停低擰轉頭微笑同佢地講
謝謝你們提醒我 我會放好的 謝謝
但係……
都真係無辦法笑住同佢地講野……

入場之前有記者淋住雨做文字採訪
問今日既安排咁樣滿唔滿意之類 問之前仲同我確認係香港人ww
真心 買得飛都夠秤啦係唔係 做得成年人就為自己所有行為負責
任何非人為問題招致既損失 除非保險有包 如果唔係 一向都無人會負責
唯一會負責既就係自己
依家唔知點解會有咁多巨嬰走出黎嘈完一樣又一樣
咁多年黎 我地睇演唱會遲到早退淋雨睇到傷風感冒 一樣都係自己負責
唔通要偶像比返醫生錢我or出返糧比我咩

好唔容易入到場 著好雨褸 其實都係濕哂ww
暴雨中開場都唔係第一次 往年迪士尼都有由開場落到散場都未停過既
由開場開始嗌 今年同往年工作唔同 我唔使保住把聲 可以嗌到失聲！
獸哥一出黎就君臨天下咁(諗多左
呢個時候佢個頭都仲係好靚仔架

staff一直走黎走去 係度忙住幫佢地擔遮
但再貼身既staff(幫獸哥擔遮既貌似係阿邦 我最初以為係小花)都唔能夠讀到佢地心
獸哥一唔使人地幫佢擔遮 就撥手趕人咁哈哈哈
好霸氣 (當然知佢地唔會咁對staff
後來行出黎延伸舞台 班staff仲會就攝影機位 唔好比cam man影到自己
真係好想知道到底佢地耳機入面有多multitask同時進行緊
無論係黑衣人定係五個叔返都真係好厲害

話說坐呢個位 個台一噴野就全部食哂
OAOA噴野 已經嚇鬼死
去到後面唔記得邊首 已經去到尾 我地又係嚇親
其實都睇左咁多場 點解都仲可以嚇親orz
對自己有D失望哈哈哈哈哈哈哈哈

因為落雨 窒礙左獸哥入陣曲半跪solo 可惜可惜
好彩高雄場有睇到

傷慢 冷靜等睇獸信安定靠

然後D雨落下又停下 唱完快歌真係好熱 想除左頂帽又怕突然傾盆大雨

上車車之後 陳姓主唱主動幫鼓手同獸哥擔遮
但前面石頭同瑪莎無人理 後來有staff衝上車 幫冠佑同石頭遮一遮
陳姓主唱應該淨係遮獸哥 but呢位人兄係度郁黎郁去 獸哥又郁黎郁去
於是 根本無遮到雨！！！！
笑死 我從來未見過我偶像個髮型扁到呢個地步 都唔知笑佢好定唔笑佢好

開時光機既時候 應該要舉高螢法棒 但獸哥貼心提醒行雷 擺心口就夠喇
主唱話擺心口 咁我再踎低D
喂！咩意思！

入場之前已經有行雷閃電
：無事既 著左雨褸大家都有層膠 唔導電wwww