父親節special 連儂牆


【爸爸不在的父親節】

孩子的成長快得像變戲法，去年初見，張 B 九個月大、仍在學站，今年再見，他已經自己通屋走，喜歡看 YouTube 那些有點 creep 的車仔染色片，玩著他的電動停車場自得其樂，口中嚷嚷著最多的，不是「媽媽」，而是「車車啊」，還有偶爾冒出的、類似於「爸爸」的 BB 話。

「其實你覺得 BB 有無爸爸呢個概念？」
「可能爸爸對佢嚟講，係個電話囉，唔知呀。」

因為，張 B 和爸爸張可森的溝通，一直都是隔著玻璃、透過一部電話。

「佢都幾醒目，本身都幾頑皮幾嘈，但係去到就又幾 sweet ，一拎起個電話，就識得叫『爸爸、爸爸』，又識得隔住個玻璃同佢玩手板。」

「有時 BB 同爸爸玩，好想拎包紙巾，遞去玻璃對面俾爸爸，想爸爸接住，發現原來接唔住，就會唔開心。」

張太說，她並無特別和張可森討論過，何時、是否應該帶張 B 去探監，「無覺得唔好帶佢去探，無覺得唔好帶佢去呢啲地方，唔好比佢知。」張 B 第一次去探爸爸，是去年農曆新年，他只有幾個月大，到近半年香港「復常」，探望變成每個月一兩次。

＊＊＊

「我有時都覺得自好慘架，我成日都覺得自己好慘㗎，哈哈，我而家都覺得自己好慘㗎！」張太邊笑邊說。

哈哈地說著慘，是因為現實已習慣了，兩年多足以令一些傷痛潛藏，但卻消減不了現實的困難；張太理所當然是家庭經濟支柱，和張 B、工人姐姐還有一只貓，租住了新界大西北一個單位，星期一至五上班，下班回家湊仔，星期六由大西北遠赴赤柱探監，星期日姐姐放假，與張 B 單打獨鬥，週而復始。

「我都想星期六瞓到自然醒，老公幫手湊仔，點解要咁辛苦自己湊仔，仲要起身山長水遠去赤柱。」

「但係都係要做㗎。」

張太說，當初她和張可森決定要生小朋友，是很自然的事，即使當時張可森已經有案在身，「不如生小朋友？好呀生小朋友啦」，但在外界看來，這實在是有點瘋狂，畢竟可以預期，丈夫、爸爸可能長期消失，所有擔子都落在張太肩上，但與其說怪責和埋怨，張太說，她更多是慶幸當時這個決定。

「BB 好似係我嘅精神支柱…我覺得佢令我做得更好，更加努力工作搵錢，更加努力維繫呢個屋企，令我覺得時間過得快咗，如果唔係佢，我會覺得時間好難過。」

＊＊＊

訪問之日，是父親節前一日，張太獨自往赤柱探完張可森，「佢有問點解 BB 無嚟，我話落大雨呀、唔嚟啦。」張太說，他們談了很多無無聊聊的事，「講咗啲私飯臭咗，我就笑佢肥，叫佢唔好食咁多私飯，『咁辛苦唔好食囉』。」

但事實上，苦他們都有、都懂，張太說，張可森身在牆內，情緒當然不會太好，亦會怪責自己不能陪伴在家人身邊，她自己就有數之不盡的現實問題要處理，但即使如此，見面之時，他們都會盡量歡樂地渡過這每星期 15 分鐘的探訪時間，「我唔想呢 15 分鐘，用咗嚟訴說一啲好唔開心嘅感受，既然咁辛苦每星期抽時間去，我會想正面渡過。」

選擇去正面，是否因為已經消化了情緒？張太說，不是消化不消化的問題，而是她確確實實，每日都有實際事情要去處理，「我而家都好 focus 喺湊仔」，情況最壞都不過是繼續如今的生活，「再壞都係而家咁，無佢喺度之嘛。」

例如眼前要思考的，就有張 B 的教育問題，不經不覺差不多兩歲，過三個月要上 N 班，「雖然 N 班都未讀，已經要煩幼稚園要揀邊間、小學揀邊間」，張太說她作為「嫁入嚟」的人，對於居住的地區校網並不熟悉，若到他區就讀則有很多配套要考慮。

「佢老豆經常聲稱，不如試吓報吓九龍啲學校，『我第時出返嚟，幫你湊 BB 返學，你返工養我』。」

「咪到時再算囉，可能到時老豆，真係出咗嚟呢？」

後記

這是張家第二個，爸爸不在的父親節，去年我們問張太，日後張 B 長大，難免會問爸爸去了哪裡，當時張太說，「到時先再諗。」但結果爸爸去哪了的問題，更早地不期而至。

「有時同 BB 返 playgroup，老師發現佢對住男老師特別乖啲，都會問下『佢對住爸爸係咪都特別乖㗎？』」 而作為一個媽媽，張太亦加入不少媽媽 group，不時會約一班媽媽出來玩，閒談時少不免會提及另一半，預期類似情況隨著張 B 入學會愈見頻繁，「我直情想話晒俾佢聽，發生咩事添，『佢老豆坐緊監呀』。」

「可能簡單咁答，爸爸而家唔係一齊住囉。」始終你無法預期，他人得知張 B 爸爸的情況後，會有甚麼反應，張太大概也只可以含糊其辭。那若果問的是張 B 自己呢？

「如果佢真係要知，又聽得明白，咪講佢知囉。」

============================================

去年也是同一個張家

@hazelnutcoffee - #父親節special #連儂牆