［接龍］ ☆流星☆🐥👑
我哋嚟接一個如果線：如果平良同清居晌香港會點

以下下收開始

由細到大，我都係口齒唔伶俐嘅小朋友，仲要係幾嚴重個隻。

屋企人一直都帶我去睇唔同醫生，言語治療、民間療法、拜神、上大陸搵神醫咩都試過哂，到最後只係俾人呃錢多…言語治療師個陣語重心長咁同媽咪講話「唔好再哂錢睇啲唔知咩醫生啦，佢大咗就會自然咁好返，俾啲時間成仔啦」

只要一同陌生人講嘢我就會口吃，講唔到完整嘅句子，就算我幾想回答人哋問題都好，把口都只係講得啲細碎嘅斷句…

父母怕我咁樣一個人玩太悶就買咗部單眼相機俾我，佢哋話「如果用語言表達唔到自己，不如試吓用影像」

自此之後，我嘅童年除咗自己同自己玩，就係同父母去唔同地方影相…但係咁樣並冇解決到根本嘅問題，年齡漸長嘅我亦都唔想令父母再咁擔心只好認真地學習影相，但影相對我嚟講亦都只係應付父母嘅一個方式，佢哋可以好放心咁俾我經營呢個看似係我嘅興趣嘅一件事，亦冇再同人講話擔心我第二時點生存…

返學都係一件令我覺得好痛苦嘅事，因為講嘢有障礙嘅關係，盡量我都唔想同同學有任何接觸，晌班入面成為到透明人係我返學唯一嘅希望，總好過俾人蝦同打…

「佢唔鐘意同人講嘢㗎」「個條友好陰沉㗎」「喂你係咪啞㗎？」「我我我，我咩吖，你鵝嚟㗎」「再講佢聽日拎把刀返嚟插你啦」

人哋成日話小朋友講嘢先係最殘酷嘅我好明，呢啲嘲笑嘅說話由小一聽到高中，本嚟以為高中最後一年可以好好咁過嘅我因為學校安排問題而又要再換一次班…9月開學第一日又要再嚟一次自我介紹…

RU -戀二度/唱K : 唔明點解17歲嘅人生以來都已經試過咁多次面試present都仲係咁緊張同咁不安，鄧一成（平良）覺得自己真係廢過地底泥，佢覺得自己就好似今朝佢喺返學校途中路過嗰條明渠入面嘅鴨仔隊長玩具咁被逼喺呢個世界隨波逐流，鴨仔隊長原本應該就屬於喺屋企浴室浸住暖笠笠嘅暖水陪住小朋友玩，點解呢隻就咁慘喺又臭又污糟嘅明渠入面轉下轉下，原本黃色嘅身體都整到烏卒卒，好慘仔咁…

但佢而家覺得自己仲慘啲，因為佢又再一次因為緊張口吃窒哂機咁不停re住自己個姓「鄧鄧鄧鄧鄧…」身邊啲同學已經開始取笑佢「喂！你係咪rap緊啊？」「條友係咪係度玩嘢㗎咁搞笑嘅？」咁俾人笑到無地自容，睇嚟高中最後一年都要繼續成為金字塔入面嘅底層，一成呆企咗喺度完全唔知點算咁，就喺呢個時候，有人打開咗課室房門，一陣大風將窗出面嘅宮粉羊蹄甲吹咗入嚟…

☆流星☆🐥👑 : 宮粉羊蹄甲嘅花瓣吹起成為咗一度小小嘅旋風，同呢度風一齊行入課室嘅同學俾後面嘅陽光照住，神光咁映照住佢
呢刻，課室入面嘅所有人都俾呢個靚過名畫嘅映像帶走咗注意力，包括班主任。
入嚟嘅男同學冇將望住佢嘅人當成一回事，照住佢自己嘅步伐行到老師身邊，回咗嘅班主任先至叫住佢。
「同學，你咩名呀，遲咁多嘅」
同學停咗晌度望一望大家之後好輕聲又不帶感情咁講咗自己個名
「程居奏」
就行返埋位。

大家嘅注意力依然冇晌程同學身上離開，不理男女都開始竊竊私語。

當然，一成亦都唔例外，佢對眼自此都冇離開過晴同學。

RU -戀二度/唱K : 「係…係神啊」從來無真心覺得呢個世上嘅事物靚，就算俾父母帶去荔枝角公園同志蓮淨園呢啲咁靚嘅中式景影下盆景影下岩石，其實一成都只係同父母交差，就算上到山頂去影下香港嘅夜景佢都依然不為所動，故意營造出嚟嘅一草一木同景象一成都覺得所有嘢都係合成同變咗質嘅嘢，但呢位同學俾到佢嘅感覺就唔同。

有住完美嘅model身型、對眼好似擁有勾人魂魄嘅能力，加上頭先一道晨光同一陣風將啲花瓣吹過去…佢、真係好靚。

「嘖」將痴住喺佢校褸嘅花瓣拎上手輕輕吹開，對一成嚟講呢個景象實在係太靚，但可惜今日佢冇帶住部單反喺手。

好快就過咗一個月，如同一成所諗佢順理成章咁成為咗班入面嘅最底層，而佢所稱為「神」嘅程同學就真係上咗神枱成為咗食物鏈嘅頂尖，就因為佢高高在上嘅神情同態度，同班啲男仔都叫佢做「King爺」。

☆流星☆🐥👑 : band 3學校嘅生態好簡單只係分咗上下層，好啲咁睇，啲同學未叻到識得玩勾心鬥角，佢諗住自己只要安安份份做個透明人就可以平安過渡最後呢年高中生涯。

學校嘅分組活動入面，一成好死唔死就俾老師安1排咗同程同學一組，一個個至高無上嘅king另一個係地底泥嘅佢，諗到都已經壓力爆煲，班主任仲俾大家自由入組，結果佢哋個組就係不良同學集中地，個啲同程同學打交道嘅小混混全部都入哂呢組。

好明顯，一成晌呢組就係俾人蝦個份，佢除咗要做哂成個project仲要教返其他人點樣present等老師唔覺佢哋成班做free rider

「喂咁搞唔掂喎，點講呀！」「去你屋企叫燈燈教啦」「我屋企成村人晌度教條春呀」「你個度呢？」「家姐話帶同學返嚟會殺咗我」「咁冇喎，點呀喂聽日要講啦」「咁不如去薩利亞啦！」

RU -戀二度/唱K : 土地問題令到邊個屋企都唔方便，其實就算去薩利亞都要排隊等位，咁呢啲粗重嘢就梗係俾食物鏈最底層嘅一成去做啦，就當大家討論到唔知去邊好嘅時候，「King爺」就出聲了。
「喂！」
一成覺得皇上係唔會叫自己嘅，繼續頭耷耷望住啲功課，點知王上又再喂多次，一成先知原來係叫緊佢。
「喂叫你啊！你去排隊啦，排到再打俾我哋…」
「但但但…我應該打俾邊個…」
「嘖」
程同學就行到去一成隔離拿起支筆就撩咗個電話落佢隻手度，戇居居嘅一成仲問呢個號碼係邊個嘅，又嘖一聲之後再寫埋「程居奏」呢個名喺電話號碼隔離，殘酷又美麗嘅烙印就印咗喺一成嘅手掌心上面。

無論係偷偷喺無人嘅班房瞓晏覺定係呢啲睇唔起人嘅神情，一成都覺得呢個佢心目中嘅王都好靚好有魅力。

乖乖咁去到餐廳搵位等到王嘅大駕光臨，就係最底層嘅奴才應該做嘅事。

☆流星☆🐥👑 : 「阿king你參加咗呢個咩？」晌一成幫佢哋拎埋嘢飲返位個陣，聽到其中一個同學拎住手機問程同學，畫面影住嘅係全民造星嘅網頁，裡面有程居奏嘅大頭相同個人資料…「喔，係我表哥幫我申請嘅，話陪佢一齊玩喎」晴同學嘅態度就好似唔關佢事咁樣，一啲都唔在乎，呀呀…果然係神…神根本就唔應該坐晌度同呢班人一齊

「咁幾時初選呀我哋可唔可以去睇？」「唔清楚喎我問吓先」

一成未聽佢哋講完就已經坐埋一邊起勢咁search啲消息，由連登睇返去高登，再由高登睇到baby condum，佢仲將ViuTV上面記載住程同學嘅頁面save低落嚟做咗手機wallpaper添。

升咗上高中最後一年，一成嘅爸爸接到個offer要去新加坡做嘢，一成都跟埋去又要重新適應環境反而無辦法讀好書，於是父母就試吓俾佢自己一個人生活…

RU -戀二度/唱K : 自己一個人生活真係好自由自在仲要係咁大間成幢嘅祖屋，一成其實係住元朗國嘅圍村入面，咁爸爸去咗新加坡做嘢媽媽就跟住爸爸，所以成間屋就變咗得返佢一個人。

雖然住咁大間屋都叫中產，但喺學校佢依然仲係地底泥，有一日某個同學唔小心倒瀉咗成樽水，話想一成幫佢哋抹返佢，咁但係一成已經俾王嘅朋友叫佢去小食部買嘢飲嘢食，呢個時候一成都唔知做邊樣先好，驚冷落咗一邊又增加咗自己俾人蝦嘅機會，呢個時候，「王」就出聲啦。
「喂！你仲唔去買嘢？」
「但…但係…」
頭先成個過程其實程同學都望住，咁王就梗係不爽有人搞住佢條「靚」啦。
「喂阿邊個，你憑咩老點阿燈做嘢。」
「吓…我見你哋平時都係咁咋嘛…」
「我哋係咁，咁又點，吓？！」
俾王嚇兩嚇，阿邊個即刻急急腳話去廁所拎地拖咁逃走咗，然後程同學再喺銀包拎啲大餅出嚟…

☆流星☆🐥👑 : 程同學完全冇數幾多錢，只係將個散紙包入面啲碎銀倒哂落一成對手度。

「呢度太多…」
「多咗你咪買雪糕囉」

程同學仲好似好嬲咁用銀包拍落張台度添…
王嬲啦，呢件事係唔可以發生嘅，晌金色河川王國入面嘅國王只可以開心咁過！

一成跑住咁九衝落canteen度買嘢飲，佢摸住找咗返嚟個幾蚊自言自語「神俾嘅錢…點可以拎嚟買雪糕…」

個日放學佢返到村屋，晌以前阿爺用嚟放嘢個間房度左搵右搵，終於搵到一個好完美嘅玻璃瓶，一成將找咗返嚟嘅散銀一個一個咁放入去個樽度，呢個就係神交付俾佢嘅禮物…佢決定好好咁保存佢，仲拎起咗相機影低呢個畫面添。

呢次係一成第一次主動咁有想影嘅嘢…

晌某個周末，一成去咗市區做街攝，佢想影低一個平時好多人但又冇人嘅環境，個日佢好早就出咗嚟，晌佢影緊個陣，鏡頭入面竟然見到程同學？

RU -戀二度/唱K : 難得出嚟油尖旺區諗住影雀，影影下竟然見到王？一成知道自己成個痴線佬咁跟住人，但又控制唔到自己咁跟住人，跟下跟下就見到程同學入咗一幢大廈入面去到佢嘅停嘅樓層。
唔知哪來嘅勇氣，一成竟然推埋門膽粗粗入埋間嘢入面，係佢呢世仔都無預自己會去嘅地方──Dance Studio。

「咦先生你係想上嚟試堂？我哋呢度Jazz啊K-pop啊甚至中國舞都有㗎，睇下你對咩會有興趣？」
店員姐姐好熱心咁講解，但一成跟本都冇心聽，因為佢見到王竟然喺教室入面上緊堂，有板有眼嘅動作比起自己呢啲唔識跳嘅人真係勁太多，佢又試睇到呆哂…呆到連俾佢嘅王發現咗都唔知。

「點解你會喺嗰度㗎！」

聽得出王嘅語氣係好嬲同好炆憎，頭耷耷嘅平良又驚到出唔到聲，程同學見到佢咁先語氣好返啲叫佢慢慢講，而佢哋嚟到廟街嘅嗰個公園。

☆流星☆🐥👑 : 「我我我我…我經過個度」
「同你講嘢真係好煩！」「口乾啦」晌行過嚟嘅路程怕程同學口乾嘅一成買咗佢最鐘意飲嘅姜汁汽水同埋寶礦力，而程同學一手就搶咗支寶礦力，仲一嘢飲咗半支添…

一成晌呢個時候坐咗晌程同學隔離睇住佢

「……你，唔好同人講喎」「講？講咩？同邊個講？我屋企都冇人」「冇人？」「我父母去咗新加坡做嘢」「得返你一個？」「嗯…」「連工人都冇？」「冇…」「……如果…返學個陣有人問起你？」程同學問呢句嘅時候個人哄到好埋，雙眼直直咁望住自己，一成感覺到自己心臟好似漏咗好多拍，再好快速咁追返上嚟咁。
「就算把口裂開咗我都唔會講」

RU -戀二度/唱K : 「咁如果有人話你唔講就隊冧你呢？」其實喺香港呢個國際大刀薈發生呢啲事真係唔出奇，成日三日唔埋兩日就會發生斬人案而永遠最後係拉唔到人，真係生意好同治安好嘅地方。
「咁就由佢隊冧我啦。」睇完一成個眼神咁誠懇同認真，程同學輕輕講咗句「好核突呀你」就拎埋另外嗰支佢平時飲開嘅姜汁汽水吹，吹吹下一成就忍唔住拎起部相機影咗程同學。
「喂！你乜料啊！」
「啊…sorry…我忍唔住…」
「忍唔住係想點…」
「因為實在太靚啦…」
「吓…警告你咪再影第二次啊…」
程同學企起身想走，臨走前就補多句話「你真係好撚煩」就離開咗公園。
之後一成就返咗屋企用屋企部printer印佢今日影程同學飲嘢嗰時張相出嚟，睇住printer一下下咁掃描咗程同學嗰樣出嚟，一成拎住張相瞓喺在床望住張相好耐，到底呢種心亂如麻嘅感覺係乜嘢一回事

☆流星☆🐥👑 : 睇住張相嘅每一個細節，程同學嘅一切都call back返出嚟，佢哄埋嚟個陣帶住汗味嘅香氣，質問自己嘅態度以及聽到佢答話死都唔會講之後半信半疑嘅眼神，都令一成陷入咗迷亂嘅思路入面，佢唔知點樣處理呢種感情。

呢個時候嘅佢下半身竟然起咗反應，作為一個17歲嘅學生，精蟲衝咗上腦就控制哂佢嘅心智，同時佢亦都知道J自己嘅男同學係一件好缺德嘅事…

矛與盾之下佢只好將自己困入被窩入面
晌無光得返自我嘅世界度對住妄想入面嘅程同學為所欲為。

話咁快就係聖誕雖然佢哋呢年要面對公開試，不過高中生活最後一年成班爛仔同學都想留返啲回憶。

「喂，搵一兩日出嚟玩吖」「去邊先得㗎」「長洲梅窩個啲囉」「屌你有閪錢咩」「一係你屋企喇」「家姐話帶人返去殺咗我呀」

呢個時候嘅程同學行咗埋一成度
「去燈燈度啦，屋企冇人」

RU -戀二度/唱K : 話說一成呢啲邊緣同學，有咩人會留意佢屋企係點吖，不過程同學突然咁講啲同學又點會say no，話哂都係在學時期嘅最後一個聖誕節了。
當佢哋成班去到一成屋企門前真係打咗個突，雖然知佢係住圍村但無諗過竟然成幢三層連天台嘅村屋都係一成屋企，見到成屋古式古香又成套酸枝傢俬掛哂水墨畫咁就知佢唔簡單，但係以佢呢副尊容冇人覺得佢係啲咩公子哥兒，因此佢都冇點特別講關於屋企嘅嘢。
冇咩嘢做嘅佢哋就變咗打機大會，而一成就好貼心咁準備咗小食汽水招呼佢哋，咁同學就問一成做哂啲關於模擬考嘅功課未諗住直接可以抄功課，怕得罪人嘅一成就上返樓上入自己房拎啲功課順便可以俾佢遠離下啲人，就當佢又入神望住自己印出嚟嘅相，程同學就突然出現喺佢房門前。
「呢間你間房？」
隨口問咗句就入咗去仲坐埋落一成張床，咁一成諗起自己前幾日先打完J…

☆流星☆🐥👑 : 一成諗返起早幾日先J過嘅對象坐晌佢張床度個樣即刻變得好慌張…

「你有潔癖呀？」睇到佢咁大反應，程同學都忍唔住問…

「唔，唔係呀，我冇」一成否認咗之後晴同學就放心周圍望，見到佢放晌矮櫃部單反同啲相仲好好奇問佢係咪鐘意影相。

「屋企人晌的好細個陣買嘅」
「吓？咁有錢？」
一成冇正面回應只係問程同學係咪都對影相有興趣
「我參加個選秀比賽要有相，但我又冇識人可以幫我影…」
一成呢刻不知幾想九衝答話不如我幫你影！但經過上次廟街個度程同學叫佢咪再影之後佢又唔敢再講…
見佢冇再講嘢程同學再問咗個問題
「你冇周圍同人講吓嘛？」
「咩、咩同人講？」 「我去學跳舞個件事」 「吓…我點會…唔可能」 未睇到晴同學有咩反應，其實同學都衝埋上嚟，一個係咁問廁所晌邊，另一個就話燈燈屋企有天台不如叫埋啲女同學嚟玩

RU -戀二度/唱K : 間屋咁大連埋個天台重點仲要無大人喺度，唔叫埋啲女女嚟實在太浪費啦，男同學就send message俾女同學講到明程同學都响度，咁班女女梗係狗衝咁入元朗啦，圍村嘅好處係天台可以BBQ之外仲可以玩煙花添，喺士多就隨時有得買極方便。

不過當佢哋開始玩咗無耐，啲女同學就跟住程同學坐咗埋一邊傾偈仲話要約埋出去睇聖誕燈飾添，咁啲男同學就好無奈啦，但鬼叫佢哋話程同學喺度咩所以都預咗係咁。

女同學們話咁凍不如食雪糕，咁港女嘛仲指明要食Godiva雪糕添，村口個士多邊度有呢啲大牌子嘢買吖所以要出去市中心嗰啲商場先會有，佢哋決定抽籤睇下邊個出去買結果就抽中一成同程同學，一成又點會俾自己嘅王天寒地凍出去買雪糕吖所以佢就話自己去。

「我自己去得啦」佢拋低咗呢句就出咗去買雪糕。

☆流星☆🐥👑 : 雖然晌自己屋企，但係又唔知點解好想返屋企，係想返去得自己一個晌度嘅屋企呀…一成行出村嘅時候一邊咁諗，佢根本就一啲都唔想啲同學嚟，但係可以晌聖誕假見到程同學又好開心…

差唔多行到村口，後面突然有單車嘅鈴鈴聲，一成閃開俾佢過啦，但架車就停咗晌佢隔離。

「喂！」「程同學？！」
程同學落咗單車同佢並肩而行，個氣氛好尷尬阿…唔知講咩好…

「好！凍！」「對、對對對唔住！」「凍又唔關你事對咩唔住」「…」

「即係咁，你唔係應該問點解我晌度嘅咩」
程同學經過一陣嘅沉默之後咁問我…
「…我…我覺得程同學好似唔係同大家好夾咁…？」
程同學冇回答到呢個問題…死啦，我係咪講多咗？
「你，坐返架單車」「嗯、好，咁我自己過去買」「唔係呀，嘖」程同學好似好嬲咁嘖完就坐咗上後座。
「你車埋我呀，唔通要我行返去？」

RU -戀二度/唱K : 國王嘅命令奴隸不得不從，就咁樣程同學同一成就背貼背咁騎上咗部單車度，路途中間因為王話想睇下傳說中嘅南生圍係點，所以就兜咗過去嗰邊。

雖然嗰邊已經生滿咗雜草無人整理，但別有一番大自然風味，冬季加上溫暖嘅日光，河畔映照出嘅太陽更顯浪漫，程同學話因為細個屋企人好忙都冇人帶過佢嚟，一成係第一個帶佢嚟呢度嘅人，講完佢又有啲怕醜咁口upup話自己點解要講俾一成知，呢個大概又係一個得一成知道嘅秘密。

兩個身高180嘅仔踩住單車梗係引人注目，啲popo見到即刻想截停佢哋，但程同學就叫一成再踩快啲，結果嘛都係俾啲popo捉到，因為又唔算好大件事同初犯，所以就交由佢哋學校處罰佢哋。

咁佢哋臨近考畢業試，老師懲罰佢哋嘅方式就梗係瘋狂做試題，就算佢哋唔識就等佢哋瘋狂抄答案等佢哋入腦都係一個唔錯嘅方式

咁就算清居唔想都叫做有hea抄，兩個人都抄到隻手黑哂都係鉛筆印，呢個時候悶得滯嘅程同學就將隻手hi落一成塊面度，一成當堂成個花面貓咁塊面灰咗一撻。
「哈哈！呢個就係懲罰你成日偷望我！好核突㗎你知唔知㗎！」
咁一成就捉住程同學隻手，一路話知一路反抗，唔小心都hi咗落清居塊面度，就係咁兩個人就開始你追我逐仲拎住啲寫滿答案嘅紙互相hi嚟hi去。
「仲有呀，你唔好再叫我程同學，叫我奏得啦，同學嚟同學去好奇怪。」
「欵…但係我唔知改唔改到口…」
「改唔到口你就唔准再望我！」
一輪新嘅追逐戰就開始，結果搞到花面貓同校服都污糟咗嘅佢哋求奇交完差就一齊去咗一成屋企，兩個人輪住沖完咗再上咗天台度傾偈。
「件衫會唔會太大？」
「唔會呀啱啱好。」

☆流星☆🐥👑 : 程同學望住好靚嘅夜空睇咗陣冬季大三角，又見到一成天台仲有觀星望遠鏡就叫佢教佢睇，其實一成都係聽爺爺講過吓，佢戰戰兢兢咁同程同學講邊個星座咩方向，佢嘅嘅距離突然就拉近咗好多咁。

睇完星，程同學見中午個陣未玩哂嘅煙花就拎嚟玩。

個畫面好靚，一成心諗。
佢對手唔受控咁拎起部單反，但遲遲都落唔到手影。
因為程同學實在太靚，每一刻都應該烙印晌自己對眼入面。

最後得返啲線香煙花，程同學點著咗望住最後嘅余光個陣邊問一成係咪唔鐘意煙花？

「鐘意…但我有比煙花更加鐘意嘅嘢…」
一成呢吓先回神過嚟…
佢想將呢個比煙花更加鐘意嘅嘢影低。

「奏」
聽到佢叫自己個名嘅程同學望咗過嚟 對住佢微笑咁話 「你咪嗌到囉」

RU -戀二度/唱K : 拉近咗距離嘅佢哋，終於迎嚟程同學參加全民造星最終選拔嘅時間，而程同學暗中去學跳舞私下有幾咁努力，就只有一成一個人知道。
成班同學都知道程同學聽日會去電視台進行比賽，前一日就一齊去一成屋企為咗應援程同學而做足準備。
寫住「We♡程居奏」嘅藍色應援T恤、印住程同學個樣嘅應援扇，仲有閃下閃下嘅燈牌都幾落重本。
「等我幫你摺吖。」同為食物鏈最底層嘅女同學，咁成班同學梗係覺得佢同一成好夾啦，所以都成日開佢哋玩笑。
「喂！燈燈，幾時會同人告白呀？你哋都幾襯吖！」
「係囉係囉幾時一齊呀…」
雖然成班都係高中生但都仲好似小學生咁講笑，不過呢個笑似乎國王表示唔領情。
「你哋幾多歲啦呢啲笑咁無聊都講…喂！我啲嘢飲飲哂啦！」
一句就打斷咗個玩笑同埋命令埋一成，一成仲唔成個人仆過去幫國王斟嘢飲，係物理咁仆到過去。

☆流星☆🐥👑 : 諗起頭先程同學不滿咁話啲同學個陣，女同學個面露出嘅神情好熟悉，呢個係對祟拜嘅人先擁有嘅表情嚟，因為佢自己望住程同學個陣都係咁嘅樣…

就結果而言，程同學入到最後四強但冇贏到，成班同學晌門口接佢，知道佢輸咗大家都表面安慰嘅，而程同學就話要同啲人打招呼所以行先，一成對腳不自覺咁就跟住程同學後面，見佢行咗入後台冇人嘅地方，好不憤咁打咗牆一下…

事後佢哋返咗去薩利亞食嘢，成班同學開始講埋啲嘢揶揄程同學，話其他人好好多，程同學都好努啦不過唔夠人嚟，廢話，你班垃圾冇資格講任何嘢，程同學係神你哋竟敢話佢唔得？如果有刀嘅話我仲唔將你班友斬到一碌碌拎去餵狗？

程同學本人就一直坐晌度玩手機，牆邊草講咩佢都聽唔到咁。

RU -戀二度/唱K : 外表睇起嚟冇乜嘢實際其實係好在意，自己咁努力去練習跳舞，到最後竟然贏唔到真係好唔甘心，輸咗原本已經心情唔好仲要俾人單單打打，最後程同學都係決定早啲離開現場自己靜下，話出去聽個電話但其實係借機走人，而死忠嘅一成當然就跟埋去，不過佢就唔知自己跟埋去又可以點。

既唔識氹人開心連講嘢都有困難，但佢對腳好似唔屬於佢自己咁跟住程同學，佢都未行到程同學隔離，程同學就已經知佢嚟咗。

「變態佬！」

程同學大叫咗一聲嚇到一成退後咗幾步，見到佢咁嘅反應又覺得自己唔可以遷怒於佢，然後就開始講點解想參賽。

「其實我…細細個就好想上電視㗎啦…無論係做演員定歌手都好。」

「程同學本身都已經夠特別㗎啦…」

唔知點解聽到一成咁講就無名火起，到底佢係咪都同其他人一樣都係咁睇自己，又覺得佢呢句係同情緊自己。

☆流星☆🐥👑 : 「你係咪同情緊我！」累積起嚟嘅怒火一氣衡口而出，程同學都唔知點解自己只係對住一成先咁，情緒波幅好大

「我，我一直都鐘意程同學阿…！」俾自己抽起件衫嘅一成並冇道歉，反而講咗呢句咁不明所以嘅嘢…佢係好煩，好痴線，有病！

「你唔好再接近我，痴線佬！」程同學推開咗佢就咁走咗…

全民造星完咗之後學校明顯發生咗變化，叫做改朝換代先啱，啲白鴿眼同學個個都轉哂口風，由好鐘意好祟拜程同學到私下笑鳩佢話佢發明星夢不自量力，成班都垃圾，應該全部拎去堆填。

某日佢哋成班又叫燈燈去買飯，其中一個爛仔俾一波同學飛咗就拎燈燈嚟出氣，話佢買錯咗豆腐火腩唔係冬瓜火腩發哂癲狂屌燈燈。

程同學一直睇住事態發展，出聲屌返佢俾女飛拎人出氣成個智仔咁。

RU -戀二度/唱K : 自此之後爛仔同學嘅態度就越嚟越差，仲開始做埋啲無聊嘢添，連群結黨嘅佢哋企圖謀朝篡位，喺小息時間趁老師唔喺度，佢哋拎咗好多沾滿粉嘅粉刷一個又一個咁掉向程同學，搞到佢成身都係粉，但程同學都好似唔多在意咁講咗句「無聊」，激到爛仔同學上前再次挑釁。
「以為自己好巴閉呀？真係當自己係明星呀？」
程同學拉起爛仔同學件衫差啲就想打落去，但呢個時候一成就衝上前一拳打咗落去爛仔同學度，佢仲好似失哂控咁想上前繼續打，如果唔係有其他同學捉住佢，爛仔同學應該會俾佢打到爆哂缸。
「你係咪痴撚咗線呀？」
平良係人生第一次同人發生衝突，就係因為佢心目中嘅「王」俾人詆毀，而程同學都係第一次見有人好似撞邪咁崇拜自己為咗自己出頭。
呢啲就係佢一直好嚮往嘅嘢，狂熱fans追隨住粒星甚至當佢係神咁拜，當人哋侮辱佢粒星就會發哂癲打人。

☆流星☆🐥👑 : 「鄧一成…喂，鄧一成？」「、係」「老師都知你係想保護程同學嘅，OK㗎啦你返去上堂啦」
「我保護咗程同學？」
「係呀，你返去上堂啦」

一成將「我冇呀，係程體學保護我至係」呢句嘢吞返落口，向老師講多謝就行返班房。

班房入面冇程同學嘅身影，一成最後晌音樂班房度見到佢…

午後陽光照射住程同學，佢望住窗外嘅風景，呢個畫面真係好靚好神，一成個靈魂俾佢勾住慢慢咁行咗過去晌程同學對面坐低咗

「啲粉搞到個頭白哂又得番皂可以洗頭，啲頭髮好硬」
「唔係呀」
「唔信你摸吓？」
「…都係咁靚」
「…又講呢啲…？」 雖然程同學咁講但佢嘅聲線唔係嫌棄。 「你，係咪鐘意男仔？」隔咗陣，程同學好輕聲咁問一成。

RU -戀二度/唱K : 一成比程同學突然咁問佢係hang哂機嘅，因為佢唔係因為程同學係男仔先鍾意佢，係因為佢係程同學，係喺佢心目中如同「神」一樣嘅存在。
「呃…唔係，應該話唔關男定女事，只對程同學先有呢種感覺…」
可惡，原本諗如果佢話佢鍾意男人嘅，自己或者就可以打蛇隨棍上同佢講其實自己都一樣然後告白就一齊，點知佢講嘢都仲有1999…
嘛…不過唔急。
自從發生咗打交事件之後，原本留喺程同學身邊嘅人都行開哂，最後只係剩返一成喺佢身邊，自然喺學校食飯或者放咗學都會變成兩人獨處嘅空間，不過佢哋好少傾偈，只係靜靜咁喺對方身邊。
而呢段期間程同學放咗學都會成日去一成屋企，程同學會要一成幫佢做功課，而自己就碌手機或者睇下嘢咁。
「好香…呢棵係咩嚟？」
佢哋今日出咗花園，一成埋頭苦幹做緊功課，而程同學對一棵充滿香味嘅樹好好奇。

☆流星☆🐥👑 : 一成屋企有幾棵由老人家種嘅桂花，佢哋個陣會收集起嚟做好多桂花嘅甜品，一成自己都好鐘意呢個味道，因為會令佢諗起一啲好開心嘅時光。

「呢幾棵係桂花嚟，佢哋呢個時候就會盛開」
「好香嘅味道」

屋企嘅桂花樹唔係好高，開咗嘅花剛好就同程同學差唔多高度，呢個畫面好靚…靚到令一成對眼完全離唔開佢哋，但佢對手都好自然咁拎起相機…

已經習慣咗一成影佢嘅奏望咗眼一成就繼續望返啲花，感受當下甜中帶酸嘅香氣。

呢種香氣嚟緊都帶俾佢唔同程度嘅酸苦…

過咗一段時間，呢段中學快閃曖昧期終於迎來結局。
程同學登上咗時裝雜做平面model。班上面嘅同學對程同學嘅態度又再次轉變，由嘲笑佢發明星夢變成搵佢要簽名…一成第一次搞懂咩係牆頭草。

程同學同往時差唔多冷淡咁回應，佢個人無論點都好，都係維持住同樣嘅感覺

RU -戀二度/唱K : “好想佢快啲講…好想快啲一齊”呢種想法就咁帶到去佢哋畢業，程同學以為繼續等會等到開花結果嘅一日，但就一直只聞到嗰種酸酸甜甜嘅味，而佢哋嘅關係始終都未能更進一步。
當佢慢慢越走越前嘅時候，一成仲依然係原地踏步用祟拜嘅角度去望住自己。
就咁樣就到畢業嘅嗰一日，程同學都以為一成會喺畢業嘅呢一日同佢告白，佢哋就可以順理成章咁一齊，當佢同啲同學講哂拜拜後就嚟到學校暗位無咩人嘅地方同一成單獨相處，而一成都如佢嘅劇本咁跟住佢跟到嚟暗位嗰度。
「跟蹤狂！」
「啊！對唔住…」
跟到上嚟唔係應該有啲嘢要請咩，等咗一陣一成都講唔出一句說話，程同學開始變得煩躁同心急。
「喂…你無嘢要同我講咩…」
「有嘢要講…呃…我…」
嘖！你唔係鍾意我㗎咩！
程同學踏前咗一步嘴咗去一成度，不過就一秒之後程同學就推跌咗一成。

☆流星☆🐥👑 : 點解我會咁做？點解我要咁做？明明係佢鐘意我先，點解？
呢一秒唔止一成，程同學都不斷反問自己
推開咗人嘅佢塊面都紅哂，除咗嬲仲有一啲佢唔明嘅情緒晌內心，佢唔識得點面對就揀咗離開現場…

「拜，再見」

程同學留底咗呢句說話就走咗。

「再見」到底係不再相見，定係我哋會再見面？
一成諗咗好耐都冇答案，而呢個諗嘅過程之中佢換咗電話，換埋電話號碼，上咗大學，入咗攝影部。

晌中學個陣做食物鏈最底層嘅佢去到自己一個人冇朋友都冇問題嘅大學度反而識到朋友。

「喂？一成晌邊度？」「大門個邊…」

未收線一成已經俾人從後抱住，呢位就係一成人生第一次真正識到嘅朋友阿山，佢都係攝影社嘅，晌佢哋入社第一日，阿山就幫一成解決咗佢口吃講唔到嘢嘅問題，自此之後佢哋就成日一齊出去，無論返學定去影相…