不愧為大陸網民評做9.8分既漫畫啊……
睇第一眼，見到極其精美但又傳統既畫風，心諗又係比較王道既漫畫，主題仲係書籍，對於最近幾乎只睇なろう系又討厭書蟲既我黎講，完全係風馬牛不相及既作品。
故事一開始講主角身為特殊既混血兒被全村人欺負，直到遇到一位願意借書俾佢既司書，令佢立志要成為司書，我本來期待主角點樣大覺醒或者得到最強同伴然後開無雙，雖然主角有先天隱藏既力量，亦有なろう系之中因為主角既溫柔而得到既強大同伴，但呢D野都冇成為重點，重點係主角作為一個人點樣成長，而唔係好似其他主角咁單用溫柔兩個字由頭無雙到尾。

前面講既司書教識佢意志可以點樣改變自己，此後主角磨練自己既身心，兩方面同時變強。
第二章故事舞台一口氣擴大，加入多位新角色，完全唔似其他なろう系，漫畫視點唔會單依賴主角同反派兩個視點，角色之間有充分既互動，視點轉換亦十分自然，人物睇落非常之立體，特別係作者點樣先用第一印象令你討厭角色，到令你欣賞角色，簡直係爐火純青，亦令人思考好多社會問題，比如故事世界觀中都有重男輕女既問題，但故事出色咁平衡左雙方意見，重男輕女某程度上符合大自然既發展，破壞呢種關係可能會引發咩問題，但故事人物亦都主張人應該可以自由選擇生活方式，因為性別而歧視他人亦有唔妥。漫畫唔依賴主角或某一兩個角色，大部分年長角色都用自己既方法代作者講佢既道理，而主角只係負責求同存異，經常心懷謙卑。

但終歸故事係非常王道，唔少展開都可以被預測，但又不乏活力，令我睇得非常舒服(除左講書本知識我會飛住睇)，實在係精品中既精品啊。