當公司變咗花生產地個陣真係日日新鮮日日甘…

唔記得之前講到邊，集數太多。寫返個懶人包俾自己以後睇返黎笑先（喂

今年3，4月個陣公司空降咗條友黎做老細下面個位，title 好勁係assistant general manager，簡稱AGM，我估大公司的話應該係CEO個類啦，有傳話老闆舊年已經搞緊移民，想將間公司交俾一個信得過嘅人睇住。
咁就搵咗呢個人返黎喇

呢位AGM黎到公司已經好睇唔起人，覺得成間公司都垃圾嘅態度係好明顯嘅。
而佢上任時老闆已經將兩個女sales轉去佢條team度，一個係做咗個零月嘅J，另一個係P。
個陣最大改變係佢要求sales meeting嘅present方式改成跟佢個要求。
我哋公司一直都係用一個IBM出，N年前嘅軟件叫lotus note嘅，一個非常極之咁廢，但好似唔駛錢又open source嘅企業軟件，老闆用咗20年（懷疑開公司個陣已經用緊）佢突然要改成用返excel做present係完全唔習慣，一開始老闆都爭札過，不過見AGM好堅持就俾佢話事，晌呢個時候睇得出老闆好重視佢。

AGM嘅出身根據同事所講，係本身出自兩間大公司嘅，咁其實佢又冇搞到我呢層薯仔，而低下的我只係每星期例會有份入去睇戲。
佢做咗冇耐，就開始好不滿佢手下J，每個星期例會都話佢唔識做，冇數，搵埋啲生意唔啱我哋公司等等，個種話係好羞辱個款，開會十幾個人一齊睇住佢話人呢樣唔識個樣又錯，與會同事都心照覺得J唔會做得耐。
其實話J好唔做得嘢咩又唔係，今年3到5月成個世界都好靜，疫情剛開始，又勁多人WFH，企業有錢都唔會用住，另一方面佢本身跟嘅單都係比較大型，要花比較多時間去同客溝通先有單返，唔係一時三刻就有，但係開會個陣捽佢冇數其實都幾奇怪。
而老闆見到呢個情況係冇阻止嘅，持續咗個幾月左右，5月底個陣J過咗試用期同AGM開會，個日上午佢仲安排緊同事做嘢，開完會突然就執哂嘢喊住咁離開咗公司。

全部同事都一片死寂…

想當然咁大單嘢梗係嗜血同事（？）嘅花生啦，J人緣其實唔算十分好，佢同大家都冇好多嘢傾，大家根本無從得知佢係自己走定炒。
後來經咗幾個人講就話佢係自己走嘅，不過喊住嘅自己走有邊個信丫…

搞走咗J之後，AGM嘅目標就換咗去另一個sales同了G，G係一個完全唔受控嘅人，佢係個啲完全唔駛返公司，定期有單返，一個星期最多見佢一日嘅人，但公司幾個爽客都係佢搵嘅，老闆基本上係唔會理佢做乜。
咁AGM知道佢跟某一個大客，有次開會就想佢share啲客嘅資料出黎想話將個account分出黎跟，G個吓其實都冇嘢，但就好串咁講話，喔你咪跟囉我哋個data base有哂電話架你自己搵黎打丫。
事後佢本人表示自己冇串佢 只係對方覺得俾佢串親啫。
唔知係咪G啲軟皮蛇功力太深，佢搞咗幾次都唔成功之後就又再轉目標

sales W係一個柒柒地嘅人，佢其實好勤力跟客又好淋，但唔排除佢生咗仔（男人）之後個腦都同時排出咗，個人係完全冇記性嘅，同一件事佢可以瘋狂不斷問你，問到你以為佢假膠，再火滾到佛系，佢最好嘅點係你點樣話佢都冇嘢，其實佢真係好啱做sales，難得一見嘅m系sales…
目標轉咗去W之後，AGM用返佢對待J嘅方式再打W一次，呢段期間又係2個月咁上下，但因為W係m系嘅關係，佢個人真係冇乜感覺，只係表示喔外面個市唔好丫嘛梗係佢炒我先走啦！嘅態度。
既然搞佢唔走，再加上AGM其實都坐得幾穩陣，佢就索性將啲有肉食嘅客分哂俾佢手下P。
順便再同老闆建議將W轉去跟佢…但同事又俾埋啲爛到冇可再爛嘅客掉俾W，根本就係明局佢自己唔做。
不過依然係m系嘅W，就晌呢場戰爭中鬥到最後喇…

W跟咗AGM之後，有一單好伏嘅嘢出咗黎，個單project銀碼唔大嘅，50幾萬港幣咁樣啦，但係要求多多包生仔嘅，最癲係要求120日數期。
我哋公司通常唔接受咁嘅，AGM就遊說老闆話要簽呢張單一定要接呀之類，咁老闆就開咗綠燈喇。
最後都係成功接咗嘅，只不過個客係極度陰濕同賤格，好多本身冇講嘅嘢都要我哋做埋，但係單嘢9月簽咗做好埋啦，我哋到依家仲未收到錢
老闆到簽咗再睇嘅時候先發現W嘅利潤低到離譜，就召見咗W質問，之後仲出咗個電郵叫大家唔可以再咁低利潤咁去啦，一定要有賺頭。
而W俾老闆話嘅時候AGM好似完全唔關佢事咁冇幫個條𡃁口嘅，由佢一個自己面對老闆。

可能AGM的最終绯極目的係在你老闆移民之前執左間公司.咁你老闆就唔洗心掛掛要搵人睇住啦. (喂)

莫旋＆DEES : 又真係喎，佢應該係想做好人執咗佢等老闆唔駛心掛掛

W係除咗柒之外好努力嘅人，所以佢其實點都玩佢唔走嘅，就算AGM出盡奶力日日晌房屌柒佢都唔走（真係大聲話佢，冇粗口但都係話佢咁都唔識呀個啲啦）就轉移目標去搞一個叫D嘅人，D係之前W嘅大佬黎嘅，亦係AGM未黎之前老闆嘅心腹，我成日笑佢練健身係為咗入老闆娘房一戴一露…因為佢晌呢度做咗5年幾係冇試過到數，但又冇俾人炒，實在係一個傅奇中嘅存在。
D係跟我哋公司嘅partner線，我哋有件主打product要搵人幫手賣，咁佢就係主力聯絡個啲人打好關係嘅，AGM每星期同佢開會，內容都係極難聽嘅，而且佢仲特登搵一個妹仔入去聽住佢俾人鬧，係非常羞辱人嘅事。
呢種鬧又係持續咗2個零月，模式都係一樣用羞辱式黎想趕人走，D都有返啲年紀大慨50咁上下，到11月個陣有次開完會出黎直頭心悸，情況都幾嚴重咁。

G好正, 但W 可能可以M系到最後

個AGM真係好撚仆街

11月某日星期一開例會，有一單case係政府嘢黎，D做足哂前期工作，份tender都係用哂我哋啲spec去寫，正路呢啲case我哋係唔會輸嘅，但所有嘢都冇話100%，對手只要平過我哋好多同夾硬話自己跟到spec其實都有可能中。
開會個陣AGM就執住呢一點不斷質問D，問佢如果輸咗咁點？
個吓D就爆啦，倒返轉問佢咁你想點呢？係咪要我負責呢？點負責呢？係咪要上身呢？
AGM搞到人扯火就立即自我收皮，話唔係咁嘅意思，只係問吓
但係D再繼續噴佢，兩個大叔接近鬧交咁講咗幾分鐘，然後就deadair咗。
過咗陣老闆終於出聲幫口，話呢單唔好講住喇，去下一單啦，AGM好似俾人救咗咁再問下一單嘅時候，D就企起身話自己唔係好舒服，會唔開啦就行咗出去。

其實我有一下覺得D會死晌公司（？）咁佢當然冇事，但係都要休息吓，咁發生咗呢啲嘢老闆就要出場救援，佢哋約咗D食lunch傾返，後尾嘅解決方案就係D以後啲嘢唔駛再report俾AGM喇，交返俾老闆就得，同時老闆都要D同AGM都傾返。
D個日就whatsappAGM同佢講話想約佢收工飲嘢，隔咗陣佢就收到個回覆係咁嘅

條撚樣約我happy hour呀

AGM隔咗陣知自己send錯都即刻del message，但D已經cap圖同話咗俾老闆知佢俾人叫撚樣喇

佢仲回返佢話我已經cap圖同埋想知你話緊邊個係撚樣。

呢件事晌我哋公司簡稱為L事件

我哋當然好快就知道件事啦，連舊同事谷都好多人知道咗，因為單花生實在太美味（？）大家開始個陣都係聽傳聞。
到星期5，我哋食飯就捉咗D本人親身解釋啦。

佢確認哂所有嘢（包括個whatsapp係叫佢撚樣定係其他字啦，有冇cap圖俾老闆啦等等），亦都確認咗另一單花生嘅真實性。

AGM點解會咁快入到黎做呢？一個咁高級嘅位。原來係P幫手引線嘅，P其實都係201910月入黎做，本身呢個女仔係由AGM介紹嘅，佢係未做過呢一行，個期我哋有個資深同事走缺人，咁就介紹咗佢入黎。到1月又有另一個資深同事唔做，P有一日就拎咗幾個公司嘅年曆入咗老闆娘房，話係AGM叫佢送俾佢哋，老闆娘收到就打電話多謝佢，然後可能就話咗佢知公司又缺人啦，需要啲有經驗嘅人，AGM個吓就打蛇隨棍上咁推薦自己，然後雙方一拍即合就叫咗佢入黎做。

AGM入咗黎一段時間，各同事都陸續發現佢同P應該有路，前後腳返工，下午時間又冇啦啦兩個一齊唔見人等等，但大家都冇證據嘅，只係傳聞黎。
而俾人叫撚樣嘅D，其實一早就知情，佢兩個真係有路，AGM仲要本身有家室同小朋友添。

AGM一入到公司，好快就將本身都係跟D嘅P轉去跟自己，仲要將跟緊大單嘅J趕走，將所有最有肉食嘅客轉哂俾P，其他垃圾客就留返俾W同D。（G係自己跑自己嘢，AGM搞唔到佢啲客）

老闆一直都唔知佢兩個有路，直到L事件發生咗，我哋嘅FC大隊老闆妹（HR）發現咗AGM同P嘅MPF係報同一個地址。
有證據在手，老闆娘就同AGM對質喇，話佢做咩唔申報？
AGM只係話自己冇偏私，對個個都一樣嘅就打算冇事

到呢度，老闆們已經唔再相信佢，但都不斷再俾機會佢等佢有嘢做，話係佢唔夾我哋公司文化啫，學吓應該好啲咁自圓其說呢件事。
11月底嘅時候P入房辭工，呢一刻AGM都大勢已去，老闆娘就將呢個消息話俾D同G聽，亦都問佢哋覺得點。
D俾人咁搞當然係話既然P唔做，咁AGM只係帶一個人的話即係代表佢冇嘢做囉喎，冇用架啦。而G就表示呢個人冇帶俾公司好處，相反唔好嘅就好多，佢入咗黎做公司生意都冇好咗。
老闆苦惱咗幾日就同AGM講，叫佢寫個sales plan，點樣增加公司嘅單，簡單講就係要佢證明自己有用。
中間開咗幾次會，都開到好大聲。
有一次聽到AGM講話
呢度啲人呢，好識講嘢嘅……
好明顯，佢係想將責任推出去，都係they嘅錯。

晌12月佢失勢嘅時候，個天其實都想幫佢一把，突然有個大tender神降臨，佢係有好好把握呢個機會嘅，我哋都以為老闆覺得佢有用而唔炒佢。
交完tender之後，老闆要佢交返個sales plan，佢竟然冇交到，晌開咗幾次會之後，佢卒之晌呢個星期三同P一齊執包袱離開公司。

件事都幾sweet架，兩個人連辭工都一條心

有人得知佢嘅真實死因，唔係佢叫人撚樣，而係佢唔誠實申報佢同P嘅關係。

老闆尋日仲開心到晌飛卜貼咗張相話trouble away添。
其中一個side story係11月AGM開始失勢個陣又再試圖搞G，G有一單嘢個客原本話12月中要起貨，佢質問G話如果個客一路拖咁個deadline趕唔到點算，G諗咗一分鐘左右就答佢

咁咪唔好做囉

然後AGM又柒咗………

好彩戴住口罩開會炸…差啲笑出聲

ʕ◉ᴥ◉ʔ : 佢由我入黎做已經不斷俾同事鬧，鬧到今日都仲鬧緊都冇嘢架，M到死個日

Kumi@注意清潔安全 : 加埋啲蠢同柒

𓁹𓁐Ru𓁏𓁹 : 原來已經有結局左
好睇過D八點檔劇！

ʕ◉ᴥ◉ʔ : 尋日啱啱完

同P同居咁款？ 但同地址申報真心蠢

A P無另外屋企地址
B AGM唔想比老婆知佢強積金

好在我消咗假返工先睇到現場花生

其實可以申請Mail box啦

現場花生！！ 抵晒

ʕ◉ᴥ◉ʔ : 係真心柒，佢一開始話自己住荃灣，P係藍田嘅，我覺得九成係B，唔想俾老婆知自己有嘢做

ʕ◉ᴥ◉ʔ : 尋日佢執嘢，仲要俾老闆妹全程睇住執，好似監犯，勁羞辱

好想分享呢張圖俾P

𓁹𓁐Ru𓁏𓁹 : 鬧得人多....佢都報應得幾快

D個身體應該建康返？

ʕ◉ᴥ◉ʔ : 依家冇見佢提，應該好咗啲嘅

P辭工前嘅日子，老闆娘同佢開會都幾針對佢嘅，但都未及AGM針對人咁惡同難聽