呢排做番繩攝、想學拍片、又有心做運動練實啲個身體，去到好多位會認真思考，點解我無論其他人點講(仁慈的大家多數都係讚)，心底都仍然係覺得自己又肥又唔靚。
深層原因有幾個。

最底一層係，自少就感覺到母親(對所有女性競爭對手包括女兒)的敵視，其實係刻意拒絕成為女性，本能地盡可能避免成為母親的敵視對像。
第二層係，整個成長期都在被母親的兄弟嘲笑+語言暴力下自信崩塌，以及垃圾食物當正餐又從來無照顧身體的概念，小學就愈來愈肥，排斥凌霸都稍微經歷過；中學時期繼續肥肥地，又唔識打扮，而青少年都是刻薄的，當時未學識女性主義咩男性凝視，唔係就屌打眾生。

一路到去歐洲，其實我都係唔化妝，著衫全部黑色，連身裙punk外套走天下。是歐洲男人太擅長讚美女性，日日被人咁讚讚下，開始有番啲自信。再番到黎香港，玩繩影相番工都多左要見人要有氣場的意識，先認真少少練化妝，買多幾件唔同色既衫。
再到竟然會拍拖，才有果種介意人點睇自己外表的意識，才開始認真檢視自己的外表，邊度靚邊度差，客觀檢視其實都有自知之明，但主觀心理仍然係停留係小時候被嘲笑的自我觀感。
還有一點更諷刺的是，那個親戚還曾經拿過台灣某大兒童文學獎，你話文學是不是巧言令色？梗係啦，除非唔係。(但這位親戚呢，而家又毒又禿頭又老土又醜，fair enough)
所以而家要食得健康學做運動做skincare嘗試建立番自己既身體，如果有朝一日能令自己滿意，就好好了。