最近呢段日子我係咁煲返通靈王，今日一口氣睇埋佢單行本結局n年後補完返嘅嗰個真結局，由十祭師戰鬥一直去到打葉王大人，真係之前嘅伏線都交代晒，可以見返葉王媽媽（平安時代嗰個XD），然後全部角色大集合，齊齊用愛嘅力量戰勝中二病（無誤）真係好完滿...

想當年其實我淨係睇到單行本32集俾人腰斬咗嗰本就停咗，最後記憶真係得返葉王公主...（喺線上漫畫仲未流行嘅年代我係租書店追通靈王，每出一本中文版單行本就衝去租，追到結局）今時今日先睇返佢後期嘅補完結局係咪太遲XD 然後我好想一口氣煲埋麻倉花篇，短短地廿幾話完可以衝埋佢，然後我可以安心追佢2018年通靈王新連載XD

不忍說，以前真係鍾意呢套作品鍾意到不得了，（本身超自然+古文明題材完全係正中我口味，就算而家睇返都一樣好鍾意覺得好好睇，好多概念都係覺得好有意思）十幾年前人生第一次cosplay其實都係俾咗通靈王，某程度嚟講，通靈王都算係我人生影響最大嘅漫畫作品之一www

事隔多年可以cos返仲要咁大團真係開心死，老餅真係可以好長情呀自己都嚇一跳www