選後兩三句：

永續係獨立係其中一步，呢個我明。但只係因為我有耐唔耐聽過黃洋達係節目講到。亦因為我知道佢地一路都講緊建國。

自治權、實然主權、中英聯合聲明、基本法，其實所法律嘢都係好悶好長好煩，但又要需要睇需要明。我諗都要花時間睇吓。雖然依家選完先講呢啲野好似已經太遲。

好唔鍾意有人喺熱普城五席輸四席之後走出黎抽水。雪上加霜（「雪中送屎」呢個term幾正，我鍾意）、揶揄幾句係接近零成本，但只會顯得自己人格低劣。踩低對方、恥笑對方係唔會提高到自己。你可以唔同意佢地嘅政綱、理念、選戰部署，可以批評、建議，但一味係度恥笑對手，又唔講出任何實質理據，對成件事根本無益。

可能佢唔想幫人教仔，都可能冇諗過想對政治局勢有任何影響，純粹發洩完就算。係既話都無問題既，我依家都係純粹發洩幾句，講下我自己個人觀感啫。

呀其實都唔係純發洩，其實更應該引以為戒，「我唔要成為個種人」。

一直講緊新媒體與傳統媒體之爭，呢一仗好明顯睇到新媒體仲落後緊人地幾條街。熱血嘅節目、報紙可能做得好成功，但個基數只限於「網民」，仲要係跟得貼嘅「政治宅網民」，拉返闊少少，就已經被溝淡，不足為懼。投票前幾日，泛民多名候選人宣佈棄選、戴耀廷嘅雷動計劃，加上黎智英嘅蘋果日報催谷，傳統嘅媒體影響力依然強大。都係個句，網上世界好細。唔想走入傳統媒體，都要落地接觸現實社會。

我唔想講我後悔，都唔想埋堆，唔想私怨上頭。「鬧醒人」係一件好難嘅事。A直接鬧B，插到佢上天花板，都好難會令B醒返，但如果A鬧嘅係B，但真正目標係CDEFG，就可能有「鬧醒人」嘅效果。畀人鬧第一個反應係否認，此為人之常情，但當自己唔係箭靶，就會有餘地去反思返自己嘅行為。咁先有用架嘛……

今日嘅《大香港早晨》聽咗頭一節，第二節講到黃洋達嘅方舟計劃，聽聽吓我恰著咗，一陣再繼續。

熱血公民首領一位退落黎，由鄭松泰接手。政黨需要轉型，唔再行爛仔或幫派式路線，更易於貼近大眾市民接受，都係好事。未知接下來佢哋有咩打算。黃洋達一邊講玩完，冇得救，但又向支持者講唔使擔心……呀真係純安慰定係有後著計劃……

我冇投國師的確係因為我唔太鍾意佢係facebook上鬧暈哂所有選民係港豬嘅言論，仲有一款唯我獨尊嘅姿態，佢有政治論述但無從政者嘅胸襟…係，我都係私怨行先，再加上有plan B係度，我仲有其他選擇。

或者暫時本民前或青政講唔出港獨條路點行，係只要繼續吸收養分，我願意相信仲有出路。

黃洋達或者更適合做議會外嘅工作，做返佢嘅傳媒大亨。始終香港好多人都係有政治潔癖嘅道德魔人，掟蕉講粗口都已經好暴力，要打冷震。都真係係諗點先得到更多人嘅認同。